Hauskje steinbru

Hauskje steinbru er ei svært fin steinbru, med eitt spenn over Hauskjeåna, som måler 14 meter i lengda og 3,5 meter i breidda.

Hauskje bru strekkjer seg over Hauskjeåna, og er ei steinkvelvbru frå 1905. Riksvegen gjekk over
brua heilt fram til 1985. Steinkvelvbruene blei bygde slik at steinane overførte trykket frå kvarandre og ned til fundamentet. Trykket av si eiga vekt og trafikken oppå brua heldt brua saman. Slike bruer finst òg på Mæle i Årdal og på Fister.

Ved steinbrua er det ein romsleg rasteplass, og litt nedi bakken står eit gammalt kvernhus. Frå steinbrua går det sti opp til den gamle bygdeborga på Kvernhushaugen.